ஆகாப்

உம்ரியின் மகன்; அவனுக்குப் பின் இஸ்ரவேலின் ஏழாவது ராஜாவானான். அவனுடைய வரலாறு 1 இராஜாக்கள் 16-22 இல் பதிவு செய்யப்பட்டுள்ளது. அவன் மனைவி யேசபேல், அவள் அவன்மேல் மிகவும் பொல்லாத ஆதிக்கம் செலுத்தினாள். யெரொபெயாம் அறிமுகப்படுத்திய கன்றுக்குட்டி வழிபாட்டுடன் இவன் பாகால் வழிபாட்டையும் சேர்த்துக் கொண்டான். அவனுடைய அக்கிரமத்திற்காக எலியாவால் அவன் கடுமையாகக் கண்டிக்கப்பட்டான். இதன் காரணமாக தீர்க்கதரிசிக்கு விரோதமாக அவனது கோபம் மூண்டது, அவனைக் கொல்லவும் வகைதேடினான். தமஸ்குவின் ராஜாவாகிய இரண்டாம் பெனாதாத்துக்கு எதிராக அவன் மூன்று போர்களை மேற்கொண்டான். தற்காப்புப் போர்களாக அமைந்த முதல் இரண்டிலும், பெனாதாத்தை முழுமையாக வெற்றி கொண்டான்; அவன் கைதியாகப் பிடிக்கப்பட்டும், தான் அப்போது பிடித்திருந்த இஸ்ரவேலின் நகரங்கள் அனைத்தையும் திருப்பித் தருவதாகவும், ஆகாபுக்கு வேறு சில சலுகைகளை வழங்குவதாகவும் கூறிய நிபந்தனையின் பேரில் பின்னர் விடுவிக்கப்பட்டான். மூன்று வருட சமாதானத்திற்குப் பிறகு, ஏதோ ஒரு காரணத்தினால் ஆகாப் ராமோத்-கீலேயாத் பட்டணத்தைத் தாக்குவதன் மூலம் பெனாதாத்துடனான போரை மீண்டும் தொடங்கினான் (1 இராஜாக்கள் 22:3); அவன் வெற்றி பெற மாட்டான் என்றும், அவனை உற்சாகப்படுத்திய 400 பொய் தீர்க்கதரிசிகளும் அவனது அழிவிற்கே அவனை நடத்துகிறார்கள் என்றும் மீகாயா தீர்க்கதரிசி எச்சரித்தும் அவன் கேட்கவில்லை. ஆகாபின் இந்த நோக்கத்தைத் தடுத்து நிறுத்த முற்பட்டதற்காக மீகாயா சிறையில் அடைக்கப்பட்டான். எதிரிகளின் கண்களில் படாமல் தப்புவதற்காக ஆகாப் மாறுவேடமிட்டு போருக்குச் சென்றான்; ஆனால் ‘குறிபார்க்காமல் எய்த’ ஒரு வில்லின் அம்பு அவன்மீது பாய்ந்து துளைத்தது; அவன் சிறிது நேரம் தன் தேரில் நிறுத்தி வைக்கப்பட்டிருந்தாலும் மாலையில் இறந்துபோனான்; எலியாவின் தீர்க்கதரிசனமும் (1 இராஜாக்கள் 21:19) நிறைவேறியது. அவன் இருபத்து மூன்று வருடங்கள் ஆட்சி செய்தான். அவனது விக்கிரகாராதனை, இச்சை மற்றும் பேராசையின் காரணமாக, ஆகாப் பொல்லாத ஒரு ராஜாவின் மிகச்சிறந்த அடையாளமாகக் குறிப்பிடப்படுகிறான் (2 இராஜாக்கள் 8:18; 2 நாளாகமம் 22:3; மீகா 6:16).