ஏரோது அகிரிப்பா I

அரிஸ்டோபுலஸ் மற்றும் பெர்னீசேயின் மகன்; மகா ஏரோதின் பேரன். இரண்டாம் லிசானியாவிடம் முன்பு இருந்த மாகாணங்களின் அதிபதியாக நியமிக்கப்பட்ட இவர், இறுதியில் தன் தாத்தாவான மகா ஏரோதின் முழு ராஜ்ஜியத்தையும் ராஜா என்னும் பட்டத்துடன் அடைந்தார். இவர் மூத்த அப்போஸ்தலனாகிய யாக்கோபைக் கொலைசெய்து, பேதுருவைச் சிறையில் அடைத்தார் (லூக்கா 3:1; அப்போஸ்தலருடைய நடபடிகள் 12:1-19). கிலவுதியு சக்கரவர்த்தியின் நினைவாக நடைபெற்ற ஒரு பண்டிகையின் இரண்டாம் நாளில், செசரியாவிலுள்ள பெரிய திரையரங்கில் தோன்றினார். “ராஜா விலைமதிப்பற்ற பளபளப்பான வெள்ளியினால் செய்யப்பட்ட பகட்டான ஆடைகளை அணிந்து உள்ளே வந்தார். அது அதிகாலை வேளையாக இருந்தது, சூரியனின் கதிர்கள் ராஜாவின் மேல் விழுந்ததால், அவரைச் சுற்றியிருந்த பிரகாசம் காண்போரின் கண்களைக் கூசச்செய்தது. கூட்டத்தில் அங்கொன்றும் இங்கொன்றுமாக மக்கள் இது ஏதோ ஒரு தெய்வத்தின் தோற்றம் என்று குரலெழுப்பினார்கள். அவர் பேசி அவர்களுக்கு ஒரு விரிவுரை ஆற்றியபோது, ‘இது மனுஷசத்தமல்ல, இது தேவசத்தம்’ என்று அவர்கள் ஆர்ப்பரித்தார்கள். ஆனால், இந்த விக்கிரகாராதனைக்குரிய பகட்டின் மத்தியில், தேவனுடைய தூதன் உடனே அவனை அடித்தான். அவன் சாகிற மனிதனாக திரையரங்கிலிருந்து வெளியே தூக்கிச் செல்லப்பட்டான்.” தன் தாத்தாவைக் கொன்ற அதே அருவருப்பான நோயினால் (அப்போஸ்தலருடைய நடபடிகள் 12:21-23) தனது ஐம்பத்து நான்காம் வயதில், நான்கு ஆண்டுகள் அதிபதியாகவும், மூன்று ஆண்டுகள் முழு பாலஸ்தீனத்தின் ராஜாவாகவும் ஆட்சிசெய்த பின்னர் இறந்தார் (கி.பி. 44). அவரது மரணத்திற்குப் பிறகு அவரது ராஜ்ஜியம் சீரியாவின் ஆளுநரின் கட்டுப்பாட்டின் கீழ் வந்தது; பாலஸ்தீனம் இப்போது முழுமையாக ரோமப் பேரரசுடன் இணைக்கப்பட்டது.